- Published: 28 December 2022
Við höfum ekki farið varhluta af fannferginu á Selfossi og margir í vandræðum með að komast í hesthús og að ná inn rúllum.
Sveitarfélagið vinnur snjómokstur eftir forgangskerfi, opnar fyrst stofnbrautir og leiðir úr húsahverfum, að leikskólum o.s.frv.
Reiðvegir koma á eftir göngustígum en ekki hefur gefist tími til að moka þá enn í vetur þar sem kraftur hefur farið í að moka snjó sem safnast fyrir og flytja í burtu. Moksturstæki fara fyrst eina ferð í hverja götu hverfisins til að opna eftir hvert veðuráhlaup. Næst þegar kemur að okkur er snjórinn hreinsaður betur frá húsunum eins og gert var eftir fyrra áhlaupið.
Til að minnka líkur á að lenda í vandræðum með hey þarf að sæta lagi þegar náðst hefur að moka götur í hverfinu og hreinsa frá húsgöflum.
Ef gleymist að moka inn einhverja götu er best að senda ábendingu til þjónustumiðstöðvar í gegnum ábendingagátt Árborgar en ábendingar sem berast eru flokkaðar og rata á réttan stað til úrvinnslu. Reyndar á þetta við um allar ábendingar til sveitarfélagsins um það sem betur mætti fara og það sem vel er gert.
